D'r Ro-bert-o Blanco, 't Banana Mouskouri, d'r Boy Black, misjiens zoejaar nog mieë prominènte komme allenui aaf noa Bóches. Jroeëshede oes de jlorie-daag van d'r Duutsje sjlajer trèffe ziech bij ós óp d'r Harmeneitszaal vuur e jroeës fès, want 't is wer tsiet vuur e Vastelovvendskonzeët! De Phil lieët ziech wer va zieng bètste (en sjunste) zie zieë, óch i Tsweidoezend-Achttsing. D'r 4de febberwaar zut d'r doavuur allenui va hatse i-jelane óp d'r Zaal i Bóches, woa um 13.11 oer e fiesta va sjoenkele, klètsje en mitzinge aa vengt. Dit joar ónger d'r titel 'Aber bitte mit Sahne!'
Vanzelfsjpraechend döärt óp e Vastelovvendskonzeët de buut nit feële. D'r Jules Steeboesj, 't Juulsje va Vols, en d'r Meestesj Piet sjtunt vuur uuch veëdig. Mit e optreëne van de drumband en ing demonstratie van 't showtalent van e paar van ós mieëtst creatieve leden weët d'r Trèf óp d'r Zaal e richtig Jesamtkunstwerk, e fès va herkenning, van moeziek én zjwoar jetappetseërde en verkleide bekenden. En al jans umdat 't ónger bezielde leiding van ós aller directeur Matty 'd'r Belsj' Cilissen sjteet.
Nit alling ing internationaal aanjeleëjenheed, mer natuurlijk óch de offitsiëlle plechtigheed van 't ontieëre van ózze Prins d'r Roland Jeëgesj en 't insjtalliere van d'r nuie. E deftig jebeure, dus trèkt uuch jit ördentliches aa! Hat d'r zeen um in de Vastelovvendssjtimmoeng tse komme mit de Phil, d'r awwe Prins adieë tse zage, mer vuural óch inge jówwe sjlaag tse laache? Komt da allenui zondèg d'r 4de febberwaar noa d'r Zaal, in de Dr. Nolesjtroas. Um 13.11 oer vengt doa 't jöärliche Vastelovvendskonzeët van de Phil aa. Inge entree hant v'r dit joar nit, mer uung vrije jave weët op pries jestaald.
Carnavalsconcert
Zondag 4 februari 2018 - 13.11 uur
Harmoniezaal Bocholtz
